Wie ons is

Quintes werk met ‘n pastorale hart tussen alle ouderdomsgroepe in die kerk en wil mense graag op hul geestelike reis vergesel. Sy droom vir die kerk is dat lidmate sal besef dat elkeen bruikbaar is vir die Koninkryk en ‘n verskil kan maak.

Om in ‘n verhouding met Jesus Christus te staan, beteken vir hom om ‘n pad saam met die Verlosser te stap – om tyd te maak vir Hom, Sy liefde daagliks uit te leef en só werklik ‘n impak te maak waar God hom geroep het om te wees.

Quintes en Johnlene, ‘n arbeidsterapeut, het twee seuns en is lief vir die buitelewe. Hy is ‘n kranige gholfspeler, wat hou van lees en kamp. Sy lewensleuse word opgesom in Psalm 37:5: “Laat jou lewe aan die Here oor en vertrou op Hom; Hy sal sorg.”

Lombard se hartewens vir NG Doringkruin is dat die kerkfamilie mekaar se hande sal vat en as eenheid in Jesus saam sal werk aan die uitvoer van God se roeping vir die gemeente. Sy droom vir die kerk is dat elke lidmaat as toegeruste dissipel van Jesus in verhouding met Jesus sal leef en sal help om dissipels vir Hom te maak.

Lees vir selfverryking is vir hom noodsaaklik. Lombard en sy vrou, Rykie, ‘n onderwyseres, het reeds ‘n Comrades-marathon voltooi. Hulle het drie volwasse seuns en is die grootouers van twee kleindogters. Sy lewensleuse kom voor in Filippense 1:20 en 21: “Dit is my vurige verlange en daarna sien ek uit, dat ek niks sal doen waaroor ek my sal hoef te skaam nie. Ek wil ook nou, soos nog altyd, met alle vrymoedigheid deur my hele wese Christus verheerlik in lewe en in sterwe, want om te lewe, is vir my Christus en om te sterwe, is vir my wins.”

Marike het ‘n besonderse liefde vir die Here en Sy bruid, die kerk. Soos ‘n bruid voorberei vir haar troudag, so is die kerk ook op die heiligmakingspad besig om die beste weergawe van haarself te word. Marike wil graag saam met NG Doringkruin op hierdie avontuur na egtheid en liefde vir die Here groei. Sy is ook geroepe om veral die jeug te bedien.

Daar waar mense is, daar is Marike gelukkig. Sy het baie belangstellings wat wissel van musiek, kreatiewe aktiwiteite tot ‘n liefde vir die buitelewe. Haar lewensleuse kom voor in 2 Samuel 22:30: “As U my help, hardloop ek deur ‘n oormag vyande, as my God by my is, klim ek oor ‘n stad se muur.” Life is not waiting for the storm to pass, it’s learning to dance in the rain. Met God aan ons kant is niks onmoontlik nie, want niks is vir God onmoontlik nie.