Inligting

Raadpleeg asseblief die Kalender vir datums van doopgeleenthede en aanmeldings of skakel die Kerkkantoor.

Kontak die predikante of kerkkantoor.

Die jaarbeplanning verskyn op die 2019-kalender. Weeklikse aktiwiteite en reëlings word gekommunikeer deur die gedrukte Kompas-inligtingsblad, die Kollig flitsbord-bulletin asook op Facebook – NG Doringkruin. SMS-boodskappe word ook gebruik om inligting oor te dra. Navrae, insette, voorstelle of terugvoer kan gerig word aan die Skakelbeampte of die Gemeentebestuurder.

Die gebedskapel is weeksdae oop van 08:00 - 16:00 vir enigiemand wat 'n behoefte het om by die Here stil te word.

NG Doringkruin se gedenkmuur is onlangs opgradeer en beskik nou oor 146 nissies. Die nuwe nissies kan die oorskot van vier mense huisves, terwyl die oorspronklike nissies die oorskot van twee mense kan huisves.

Daar is ‘n rustige atmosfeer by die gedenkmuur geskep en naasbestaandes is welkom om die muur bedags tussen 7:00 en 16:00 te besoek. Alle ingeskrewe lidmate van NG Doringkruin kan nissies in die muur koop.

Skakel Tia van Wyk (koster) vir meer inligting by 018 468 5002.

2 Korintiërs 9:5 – 9 God het die blymoedige gewer lief...sodat julle in alle opsigte van alles genoeg kan hê en volop kan bydra vir elke goeie werk.

Die werk in die Here se Koninkryk in Doringkruin kan nie opgebou en uitgebou word sonder jou finansiële bydrae nie. Bydraes word aangewend vir die gemeente se bydrae tot die gemeenskap, ouetehuise, kinderhuise, welsyn, getuienis, die gemeente se bedieningswerk en sinodale verpligtinge. Salarisse, oorhoofse uitgawes en instandhouding van die kerkeiendom word ook uit bydraes gedek.

Elke lidmaat is self verantwoordelik om sy/haar dankoffer na die skatkis van die gemeente te bring en daarom word geen kollektering by lidmate gedoen nie. As blymoedige gewers vertrou ons die Here vir voldoende inkomste om die direkte uitgawes te dek, maar ook om Sy hande en voete in Klerksdorp en verder te wees soos die Gees ons lei. NG Doringkruin maak staat op die aanvullende inkomste wat tydens die Tiendemaand Dankoffer in Oktober van lidmate ontvang word. 'n Tiende van die Tiendemaand Dankoffer word jaarliks gesaai.

Hier is hoe jy jou bydrae kan maak:

• Kry 'n koevertjie in Gemeentesentrum se ingangsportaal en plaas bydrae in kollektebordjie.
• Doen 'n direkte inbetaling in die bankrekening (EFT).
• Reël 'n aftrekorder by jou bank:
  ABSA Bank, Tjek rek.: 950 157 992
  Tak no. 334 338
  Naam van Rekening: Ned. Geref. Gemeente Kldrp. Doringkruin
  Verwysing: Meld asb. u van as verwysing

Die Kerkraad vergader kwartaalliks en is saamgestel uit die leraars asook die ses diensgroepe en twaalf bedienings se koördineerders/ouderlinge met opdrag.

Ds Quintes Scholtz dien as leierleraar van die gemeente en is die voorsitter van die Kerkraad. Hy word ondersteun deur twee vise-voorsitters wat deur die Kerkraad verkies is, naamlik
ds Lombard van Niekerk en br André van Staden (hoofouderling). Die uitvoerende bestuur van die gemeente word behartig deur die leierleraar en 'n gemeentebestuurder, Johan Smit. Lg. is ʼn kontrakpos wat sedert 1 Mei 2018 ingestel is om met ondersteuning van die personeelspan die dag-tot-dag-take uit te voer.

'n Dagbestuur ondersteun die uitvoerende bestuurspan in strategiese besluite. Hierdie komitee bestaan uit ses verkose Kerkraadslede en drie leraars en vergader kwartaalliks.

Die Dagbestuur en die diensgroep-koördineerders vorm die Diensgroepforum. Dié forum, wat kwartaalliks vergader, oorsien in opdrag van die Kerkraad die doeltreffende uitvoering van die Gemeente se finansiële, administratiewe en operasionele aktiwiteite, met aanbeveling na die Kerkraad.

Die diensgroepe is werkgroepe van die Kerkraad wat toesien dat die beste praktyk in elke dissipline toegepas word en tree in 'n adviserende hoedanigheid op. Ons bedieninge staan onder die mentorskap van die leraars. Lg. is die struktuur waardeur gemeentelede hul gawes prakties aanwend om medegelowiges in liefde te dien en Jesus vir die wêreld te gaan wees.

Die onderstaande organogram verduidelik die bestuurs- en bedieningstruktuur.


Bestuurstruktuur